Заврши првото полуфинале од Евровизија 2019, а оваа вечер ја обележаа и неколку контроверзни настапи.
Најконтроверзен и најморничав настап имаше исландската група „Хатари“, кои полуголи со многу бодежи и кожа на себе трчаа по бината. Гледачите имаа впечаток како да гледаат краток хорор филм. „Тоа беше микс на готика, хевиметал и садомазо-фетиши“, напишал еден од твитерџиите. „Како од пеколот“.
Големо внимание предизвика и португалскиот претставник кој со својот танц го „маѓепса“ Твитер, и поттикна лавина коментари.
Претставникот од Финска многумина ги потсетил на познатиот суперхерој Вулверин.
Српската претставничка ја споредуваа со Елза од цртаниот филм „Фроузен“, а имаше и бројни коментари дека фустанот што го носела потсетува на лик од серијата „Игра на престолите“.
Со цртаниот „Фроузен“ споредени се и претставниците на Австралија, иако коментарите во овој случај беа малку посурови, па шведскиот коментатор напишал дека нивното доаѓање на сцената изгледа како „Фроузен на ЛЦД“.
Многу коментари предизвикаа претставничките на Полска кои на мајчиниот јазик ја изведоа песната во специфични црвени костими кои не ја оставија рамнодушни твитер-заедницата.
„Полските претставнички изгледаат како секта и како сите да не проколнаа“, започна еден твитерџија, а многумина ги споредуваа и со „ѓаволи“. „Ова е доволно лудо што заслужува победа“, е еден од коментарите.
