Тајната на убавите и негувани нокти не е во тоа постојано да се лакирани или третирани со гел-маникир, туку напротив, тоа се две од четирите грешки поради кои ноктите се уништуваат.
1. Грицкање нокти – сите козметичари се согласни, грицкањето е апсолутно најлошата навика поради која ноктите ја губат формата, стануваат кршливи, а може да дојде и до воспаленија и инфекции. Исто така, оваа навика е лоша и по здравјето, бидејќи бактериите кои се наоѓаат под ноктите, лесно може преку устата да навлезат во организмот и да предизвикаат здравствени проблеми.
2. Пречесто ставање на гел – ваквиот тип на маникир е долготраен и исплатлив, но по подолг период, ноктите стануваат кршливи. Пред сè, тоа се случува поради хемикалиите во гелот, како и зрачењето со УВ-ламбата, но и самото отстранување на гелот го оштетува ноктот, бидејќи се користат големи количини на отстранувач со ацетон. Потоа следи обликувањето и отстранувањето на остатоците со турпија, што дополнително го оштетува ноктот.
3. Пречесто лакирање – лакот за нокти го спречува „дишењето“, а со тоа и природното обновување на ноктите. Доколку подолг период постојано се нанесува лак за нокти, може да се случи ноктите да станат суви и испукани. На сувите нокти полесно остануваат дамки.
4. Цигари – поради пушењето, не само што пожолтуваат надворешно, туку и поради никотинот и катранот, ноктите пукаат, а заноктиците стануваат суви и лесно крварат.
