Италијанскиот професионален пилот Дарио Коста во саботата изврши неверојатен подвиг и на тој начин напиша ново поглавје во историјата на воздухопловството – тој прелета низ два патни тунели надвор од Истанбул со брзина од 245 километри на час за помалку од 44 секунди.
41-годишниот Коста има повеќе од 20 години искуство во летање, управувал со повеќе од 60 модели на авиони и од 5.000 часа летање дури половина ги поминал изведувајќи акробации.
Ова бил неговиот најсложен потфат во кој учествувал тим од повеќе од 40 луѓе и бил директен резултат на повеќе од една година подготовки и употреба на специјална технологија. Целиот проект бил спроведен во тајност.
Тунелот Чаталка, низ кој летал овој храбар пилот, бил изграден првенствено за патен сообраќај и се користи од март 2020 година.
Од полетувањето до излезот од вториот тунел, летот траел 43,44 секунди, односно поминал 2,26 километри, достигнувајќи брзина од 245 км/ч.
