За да се подготви сирење, потребна е мајсторија. Дури и да успеете во тоа, треба да знаете дека неговото чување е еднакво важно како и неговата подготовка.
За да го чувате сирењето подолго време, треба да отстои во саламура т.е. солило на температура од околу 10 степени. Независно дали сирењето ви е подготвено дома или купено во продавница, тоа нема да ги сочува својот вкус и квалитет ако не направите солило.
Различни луѓе ја прават на различни начини, но основните состојки се исти – вода и крупна морска сол.
Подготовката е многу лесна. Ја мешате водата и додавате сол, па со готовото солило го полевате сирењето и го притискате одозгора да не излегува над солилото. Многумина сигурно имаат гледано бабите како го прават солилото. Отприлика ставаат сол и вода, па на крај ставаат едно цело свежо јајце. Ако исплива на површина, тогаш солилото е готово.
Но, ако ви треба прецизен рецепт, тогаш во литар вода се ставаат 200 г морска сол. Се прави хомоген раствор и со него се полева сирењето.
Добро е да користите зовриена и оладена или купена вода од продавница, затоа што водата од чешма е полна со хлор, флуор и други супстанции кои по некое време можат да го расипат сирењето.
Некогаш се случува иако сте направиле добро солило сирењето да омекне и стане лигаво. Затоа во некои рецепти се предлага да се додаде малку лимонтуз или натриум бензоат (конзерванс). На еден литар вода се ставаат 2 грама лимонтуз или 1 грам натриум-бензоат. Но со оглед дека често се пишува и зборува за штетноста на конзервансот, подобро да почесто да правите солило за помали количини сирење и да го чувате во фрижидер.
