Лековитите својства на тиквата во народната медицина се познати одамна. Идеална е за сите што имаат проблеми со желудникот и цревата; помага при запек и воспаление на дебелото црево. Делува како диуретик, па им се препорачува на лицата со артритис. Ги штити очите бидејќи е богата со каротеноиди. Заситува, а има малку калории, па затоа е идеална при слабеење. Помага во намалувањето на холестеролот, а една лажица сок од тиква дневно ќе ве заштити и од заболувања на мочниот меур, црниот дроб и простатата.
Крем-супа
Состојки (за 4 лица):
1 килограм свежа тиква
1 поголема главица кромид
2 чешниња лук
2 лажици маслиново масло
1–2 компири (по желба)
800 милилитри зеленчуков или пилешки бујон
½ лажичка морско оревче
сол и свежо мелена црна пиперка
Подготовка:
Тиквата измијте ја, отстранете ги семките и исечете ја на коцки.
Во тенџере загрејте го маслиновото масло и пропржете го ситно сечканиот кромид додека не омекне.
Додајте го лукот и кратко пропржете го. Додајте ги тиквата и компирот (ако користите), па пржете уште 2–3 минути.
Додајте го бујонот и варете 20–25 минути.
Супата испасирајте ја со рачен блендер.
Додајте ги морското оревче, солта и пиперот и загрејте ја на тивок оган уште неколку минути.
Послужете ја со потпечени семки од тиква, неколку капки масло од семки од тиква, една лажица кисела павлака, свежо сечкан магдонос или власец, домашни крутони или препечен леб.
Семки од тиква
Богати се со квалитетни протеини и масти, а освен тоа содржат аминокиселини, триптофан, глутамат, витамини Е и Б, бакар, манган, калиум, железо, цинк и селен.
Делуваат антистресно и антиоксидативно, го намалуваат холестеролот и го подобруваат паметењето.
