Совршеното похувано месо има крцкава коричка и добро испечена, но сочна внатрешност.
За да го постигнете тоа, не смеете да ги правите овие грешки за време на приготвувањето.
Похувате месо со различна дебелина и големина
На поголемите парчиња месо им треба повеќе време за термичка обработка одошто на помалите. Па затоа, одбегнувајте да похувате парчиња месо со различна големина и дебелина (на пример, пилешки гради и батаци) во исто тавче, односно не ги вадете во исто време.
Ако го направите тоа, едно парче месо ќе ви се пресуши, додека другото ќе биде крцкаво. Па затоа, обидете се месото да го сечете со иста дебелина.
Заборавате на чеканот за месо
Евтините парчиња месо се идеални за похување, но треба да знаете дека добар вкус ќе имаат само оние парчиња што претходно сте ги омекнале.
Без разлика колку тенки парчиња месо сте купиле, треба да ги истенчите со чекан за месо. На тој начин ќе бидете сигурни дека месото добро ќе ви се испржи.
Похувате месо кое само што сте го извадиле од фрижидер
Доколку ставите ладно и мокро парче месо во загреано тавче, маслото ќе почне да прска на сите страни, а со тоа ќе добиете и полошо испржено парче месо. Нема да биде крцкаво и вкусно.
Па затоа, внимавајте месото да го извадите од фрижидер половина час пред употреба и задолжително исушете го со салфета пред да го натопите во јајце, брашно и презла.
На тој начин ќе го спречите одвојувањето на панираниот покривач од месото кога ќе го ставите во врело тавче.
Штедите на трошки
За парчето да има вкусна и крцкава обвивка, треба да го потопите во состојки за похување неколкупати. Само така ќе добиете вкусно похувано месо.
Добро прекријте го со јајца, брашно и презла секој дел од површината на месото.
Заборавате на зачините
Ако втриете малку сол во месото пред похувањето, можно е завршниот производ да не ви биде доволно зачинет.
Па затоа, посолете ги јајцата и брашното, а во презлата можете да додадете и ситно исечкани зачински билки. На тој начин ќе добиете повкусни залчиња.
