Шестгодишен Израелец во текот на излетот со неговите родители на југот на Израел пронашол 3.500 години стара глинена плоча, која археолозите ја сметаат за уникатна.
Семејството во март се шетало низ селото Реим, кога момчето забележало мала четвртаста плочка на која биле издлабени две фигури, објави во понеделникот израелската управа за антиквитети.
Експертите веднаш го однеле предметот на проценка.
На плочата е прикажан војник во здолниште со појас како турка гол заробеник, чии раце се врзани зад грбот, објасниле експертите, додавајќи дека уметникот сакал да го прикаже понижувањето на заробениот.
Израелските власти велат дека откритието ќе придонесе за нивните досегашни истражувања на илјадагодишниот хананејски град Јерзи.
Хананејците биле народ кој се спомнува во Стариот завет. Голем дел од нивната земја, наречена Ханан, подоцна ќе стане позната под називот Израел. Хананејците живееле во тој дел околу 2000 година пр.н.е. Живееле во области кои, според древните текстови, веројатно вклучувале делови од модерен Израел, Палестина, Либан, Сирија и од Јордан.
