Документите што протекоа во јавноста даваат нов увид во плановите за погребот на кралицата, вклучително и контроли на социјалните медиуми и ВИП билети за посета на нејзиниот ковчег, пренесуваат странските медиуми.
Смртта на кралицата е планирана со код – „Операција Лондонски мост“, а погребот наводно ќе се одржи 10 дена по нејзината смрт.
Тој ден нема да биде прогласен за државен празник, а на работодавачите ќе им биде кажано сами да одлучат дали ќе им дадат слободен ден на своите вработени или не.
Исто така, тогаш сите владини и кралски веб-страници и профили на социјалните медиуми ќе имаат црн транспарент, а владините службеници нема да смеат да бидат активни на социјалните медиуми, освен ако не им е дозволено да го сторат тоа со добра причина.
Во деновите што следат, ковчегот на кралицата во поворката, наводно, ќе биде пренесен од Бакингамската палата во Вестминстерската палата, каде што ќе биде отворен за посетители три дена по 23 часа на ден. ВИП личностите кои сакаат да го видат ковчегот, наводно, ќе добијат специјални билети, на кои ќе им биде означено времето на посета.
Сепак, владата изразила загриженост дали државата ќе може да се справи со таков настан. Различни оддели покренале прашања за способноста на земјата да се справи со приливот на странски туристи, пренатрупаноста на главниот град и можноста за терористички напади.
