Не е дека Скопје е Лондон и не е дека ние не сме мрчаторски народ, ама , ама е дека кога ќе заврне, повеќето од нас биле избањати како Цацко од скечот на К – 15. Немаме многу врнежливи денови во Скопје, па и во Македонија, но имаме доволно дупки по улиците кои инстант се полнат и се идеална отворена туш кабина. А да не зборуваме за „кул“ шоферите кои „мува не ги лази“ и ноншалантно си ги прскаат минувачите.
Денеска квалитетно беше избањата една од колешките, а јас, подучена од нејзиното искуство, бев внимателна кога излегував пред врата, па само на два пати, по малку бев испрскана. Забавно ми беше, не велам не, дури и се изнасмеав, ама кратко траеше, бидејќи се сетив дека не секому му е смешно да оди до дома или на работа „утоп“. Исто така, се сетив дека започнува предизборната кампања за локалните избори.
Па одлучив да ја номинирам избањатата колешка Маја, бидејќи достоинствено го реши проблемот со вирот. Со метлата во раце, од уличното базенче, не остана ни капка. Сега цел ден можеме на раат да си излегуваме на кафе и цигара. До следниот дожд, се разбира.
