Во Тајланд, поради пандемијата на коронавирусите се воведени строги ограничувања, што резултирало со празнење на главните градски улици. Голем број од таксистите останале без работа. Но, снаодливите граѓани сега ги користат своите возила за одгледување зеленчук.
Бидејќи тајландските таксисти во моментов се без работа, тие ги паркирале своите автомобили на еден голем паркинг во Банкок што локалните жители го нарекуваат „такси гробишта“.
Меѓутоа, компанијата „Ratchaphruek“ одлучила да ги искористи покривите на возилата за да направи мали саксии за одгледување зеленчук, кои потоа ги делат на таксистите, како и на сите што останале без работа поради пандемијата.
Бројни видови зеленчук сега растат на покривите од такси возилата, а граѓаните веруваат дека ова е нивната последна опција.
„Порано се потпиравме на туризмот како главен извор на приход, но пандемијата направи многу промени. Одгледувањето зеленчук на покривите на овие автомобили нема да ги оштети. А голем дел од нив ионака се веќе речиси целосно уништени. Некои автомобили немаат мотори, други имаат дупнати гуми…“, рекол еден од локалните жители за „БИ-БИ-СИ“.
