На возраст од 54 години во зоолошка градина на северот на Италија угина Ноно Тоби (Дедо Тоби), најстариот бел носорог на светот, објави претставничка на зоолошката градина.
„Ноно Тоби угина на 6 октомври. Тој паднал одејќи кон своето ноќно засолниште, и по околу половина час неговото срце застана“, изјави Елиса Ливија Пенакиони, претставничка на Зоолошката градина.
Тоби ќе биде балсамиран и изложен во научниот музеј Мусе во Тренто, каде што ќе му се придружи на Бланко, белиот лав од зоолошката градина кој умре пред пет години, рече Пенакиони.
Белите носорози обично живеат до 40 години во заробеништво, а до 30 години во дивина.
Смртта на Тоби, која следи по смртта на неговата партнерка Шугар во 2012, го остава Парко натура вива со еден бел носорог, 39-годишниот Бен.
Останати се само два примероци од подвидот северни бели носорози кои живеат во Кенија, кои вооружени стражари деноноќно ги чуваат.
Извор: Агротим.мк
