Ветувањето кое беше дадено минатата година, дека ќе се лансира првата бјути-линија на француската модна куќа „Хермес“, беше исполнето минатиот месец. Линијата е промовирана во Париз со проекција од ликот на коњ, односно масло на платно под името „Вислџекет“ од уметникот Џорџ Стуб. Причината поради која се одлучиле за коњ е тоа што тој е силно, грациозно и жестоко животно, но истакнуваат и дека е симбол на надворешната убавина.
Срцето на колекцијата се кармини во 24 нијанси, 14 сатенски, а 10 со мат текстура, во бои од интензивно црвена до електрично розова. Нив ги следат безбојни балсами за уста, чантичка за носење на кармини, универзално моливче за уста и „Попи Лип Шајн“ сјај со тон на портокалова боја и светки кои на усните дополнително им го зголемуваат сјајот.
