Оперската ѕвезда Пласидо Доминго даде оставка на позицијата генерален директор на Операта на Лос Анџелес откако неколку жени излегоа со обвиненија дека сексуално ги злоупотребувал.
Познатиот шпански тенор беше обвинет од страна на 20 жени дека недолично се однесувал и ги вознемирувал, а тој ги негираше обвиненијата.
„Го почитувам тоа што овие жени се чувствуваат слободни да го кажат своето мислење“, стои во изјавата на Доминго.
„Сакам да знаат дека навистина ми е жал за нанесената болка. Преземам целосна одговорност за моите постапки и кажувам дека созреав низ ова искуство.“
Изјавата следеше откако беше отворена истрага за Доминго што ја покрена американски синдикат кој застапува оперски изведувачи.
Истрагата покажа дека обвиненијата за Доминго се вистинити и дека тој „покажал недолично однесување, од флертување до сексуални предлози, на работното место и надвор од него“.
Обвиненијата што беа поденсени лани во август се однесуваат на дела што датираат од 80-тите години па наваму и во нив се наведува дека Доминго често ги принудувал жените на сексуални односи, а понекогаш и професионално ги казнувал оние кои го одбивале.
Доминго (79) е во брак со втората сопруга, сопранот Марта Орнелас, од 1962 година.
