Алина Кабаева, поранешна гимнастичарка и златна олимписка медалистка за која се верува дека е љубовница на рускиот претседател Владимир Путин (и дека со неа има две деца, а според некои извори и четири деца), според она што се дознава во Брисел, а пренесува новинската агенција Аднкронос, е вклучена во листата на санкционирани лица во шестиот пакет предложен од Европската комисија.
Денес наутро Корепер, комитетот на постојаните претставници на земјите-членки, е свикан да се собере за да разговара за пакетот санкции, кој исто така вклучува ембарго за увоз на нафта од Русија во ЕУ кое ќе стапи на сила во рок од шест месеци за сурова нафта и до крајот на година за рафинирани производи.
Меѓу погодените од забраната за патување во ЕУ и замрзнувањето на имотот е и рускиот патријарх Кирил.
Да потсетиме, веќе со години кружат гласини за врската на Алина Кабаева со Путин, а гласините станаа се погласни со разгорувањето на конфликтот меѓу Русија и Украина. Оттука не е изненадувачки што Алина е наречена „тајна прва дама“. Иако врската никогаш не била потврдена, се вели дека парот има четири деца: две момчиња и две близнаци, сите родени во Швајцарија и со швајцарски пасоши. На почетокот на конфликтот „Вашингтон пост“ откри: „Алина се крие во Швајцарија, во приватна и многу безбедна вила, со своите четири деца“, а потоа група активисти покренаа иницијатива за протерување на Алина од Швајцарија поради нападот на Русија врз Украина. Пред извесен период, поранешната гимнастичарка беше фотографирана во Москва на еден гимнастички настан.
