Предноста не им е само во забавните фигури, најчесто човечиња, туку и во тоа што имаат примамлива миризба, а и долго траат.
Децата особено им се радуваат на овие слатки колаченца кои според верувањето носат среќа во куќата, а мирисаат на најубавите зимски зачини – цимет, мускатно оревче и ѓумбир. Историјата на овие кекси потекнува од 16-от век, на дворот на Елизабета Прва која на угледните гости им давала кекси во различни фигури.
Фигурите се прават со помош на калапи кои лесно се наоѓаат и во нашите поголеми продавници за домаќинство.
Па, доколку сакате да ги приготвите, еве го рецептот.
Намирници – 150 грама путер, 180 грама кафеав шеќер, 400 грама брашно, 1 јајце, пола лажичка екстракт од ванила, пола лажичка прашок за пециво, пола лажичка сода бикарбона, 1 лажичка мелен ѓумбир, 1 лажичка цимет, пола лажичка мускатно оревче, пола лажичка црн пипер, прстофат сол.
Во еден сад помешајтеги сите состојки – брашното, прашокот за пециво, содата и зачините. Во друг сад добро измиксајте го шеќерот со путерот, додадете го јајцето и екстрактот од ванила. Полека додадете ги сувите состојки и месете додека се направи тесто. Тестото поделете го на три дела, завиткајте го во фолија и оставете го во фрижидер околу еден час.
По еден час, извадете го тестото малку да отстои на собна температура и загрејте ја рерната на 180 степени. Развлекувајте дел по дел од тестата на посакувана дебелина (се препорачува околу 5-6 сантиметри), но внимавајте да не биде претенко за да не пукне. Со калапи направете ги облиците, па префрлете ги кексите во тава за печење претходно премачкана и покриена со хартија за печење. Печете околу 10 минути додека не потемнат, но внимавајте да не изгорат. Оставете сосема да се изладат и потоа украсете ги по желба со помош на боја за готвење или пак со бомбончиња за вистински новогодишен ефект.
