Твитер тоне на Вол Стрит и согорува 3,2 милијарди долари пазарна капитализација. Акциите на компанијата загубија 11% на првиот ден од тргувањето по шокантната објава на Илон Маск. Шефот на Тесла повеќе не сака да го купува Твитер и тоа го објави јавно. Компанијата Твитер има намера да го тужи Маск, отворајќи го патот за тешка правна битка.
Барањето на Илон Маск за прекин на договорот за купување на Твитер е невалидно и погрешно. Ова го наведува компанијата во писмо до адвокатите на Маск, пренесува новинската агенција Анса.
Твитер е „посветен“ на затворање на договорот со Маск по „цена и во рамките на утврдените услови“, се вели во писмото испратено од компанијата до адвокатите на сопственикот на Тесла.
Твитер повторува дека има намера да преземе правни чекори за спроведување на договорот и вели дека е „уверен“ дека тој ќе победи на суд. Твитер смета дека барањето за раскинување на договорот е „невалидно и погрешно“, како и отфрлање на „предвидените обврски“.
