Макси концертот во Централ Парк беше прекинат поради влошување на временските услови во Њујорк, поврзани со пристигнувањето на ураганот Хенри на североисточниот брег на САД. Толпата од десетици илјади луѓе присутни на настанот била повикана веднаш да го напуштат паркот и да се засолнат од невремето.
Непосредно пред почетокот на концертот, градоначалникот Бил де Бласио прогласил вонредна состојба, но во исто време дал зелено светло за настанот.
Останале уште околу два часа до крајот на концертот, со настапи на најочекуваните sвезди како Брус Спрингстин, кога силен ветер и дожд го погодиле Менхетен.
Поради најавеното страшно влошување на временските услови, сите учесници на настанот биле известени дека мораат мирно да се упатат кон најблискиот излез и да го напуштат паркот. Полицијата, за да избегне панични сцени, нагласила дека не станува збор за итен случај.
Ураганот Хенри од првата категорија урагани, според метеоролозите треба да стигне до копното за неколку часа на североисточниот брег помеѓу регионот Њу Ингланд и Лонг Ајленд, непосредно пред Њујорк. Максимална тревога има и во Бостон.
Инаку, вчерашниот мега-концерт беше организиран со цел да промовира здравје, безбедност и еднаквост, но истовремено требаше да биде и прослава „на враќањето на Њујорк“ по предизвикувачките 17 месеци обележани со пандемијата Ковид-19. Некои од најголемите музички имиња настапија на Големиот тревник во иконскиот Централ парк во Њујорјк под слоганот „Враќање дома“ пред вакцинираната публика од 60.000 луѓе.
