Тежок живот со многу искушенија имал фолк-пејачот Ѓоко Јовиќ. Кога ја загубил својата мајка, тој морал да направи нешто за кое му требало многу сила.
-Мајка ми кога почина, ние ја погребавме, и веднаш вечерта јас морав да пеам на фестивал“, рече пејачот во најавата за емисијата „Животна приказна“ која се емитува на МТВ.
Потоа, тој зборувал за своето тешко детство, кога нижел тутун: „Јас секој ден сум плачел, значи не ми се идеше на тутун“, рече Јовиќ.
Ѓоко, кој е денес татко на четири деца потекнува од Валандово. Неговите родители се занимавале со земјоделие, а најмногу со одгледување тутун.
-И јас сум го работел тоа, знам колку е тешко и затоа ги ценам луѓето кои ја одржуваат во живот таа земјоделска култура. Не се срамам да зборувам за моето минато и секогаш сум подготвен повторно да го работам тоа.
Најважната лекција ја научив од татко ми. Еден ден ме седна и ми кажа: „Сине, јас можеби не сум ти дал богатство, но сум направил сите да зборуваат за тебе само убаво. Сум оставил чисто лице“. Тие зборови ќе ги паметам цел живот“, рече пејачот во една прилика во „Женски магазин“.
Јовиќ е еден од најангажираните на настапи, турнеи и сите видови веселби, а кога ќе дојде дома го чека неговата петорка, четирите деца: Теодора, Михаил, Јоан и Дарин, и неговата сопруга Ивана.
