Без разлика дали се работи за келнери или за работа на градежништво, во месеците што следуваат понудата е прилично голема за работни места во поранешните југословенски републики. Само во Хрватска е објавено дека за претстојната летна сезона се потребни околу 35.000 работници.
На Хрватска ѝ недостасуваат 35.000 работници
Од 150.000 работници кои ѝ се потребни на Хрватска за претстојната летна сезона, меѓу 30.000 и 35.000 моментално недостасуваат, соопшти Хрватската служба за вработување.
Иако Хрватска законски го регулираше ангажманот на сезонски работници, сепак многу сезонски работници од пазарот на трудот одлучуваат да заминат во странство.
Ниту платите не се мали, на пример, платата за готвач се движи од 2.000 до 2.500 евра, за келнер околу 1.000 евра плус бакшиш, а другите помошни работници можат да очекуваат плати од 500 до 1.000 евра. Треба да се напомене дека кога ќе ги погледнете огласите на Интернет, со овие плати речиси сите работодавци нудат сместување, а многу голем број од нив обезбедуваат оброци на своите вработени.
Црна Гора увезува сезонци
Проблемот со недостигот на работна сила е нешто со кое Црна Гора се соочува долги години. Оваа земја на почетокот на годинава ја зголеми побарувачката за работници, бидејќи како и во случајот со Хрватска, официјални извори од Црна Гора наведуваат дека главната причина е бегството на домашната работна сила во странство.
Како и минатата година, во Црна Гора се очекуваат високи плати за сезонските работници. Огласите на интернет нудат плати на шанкери од 800 до 900 евра, за келнерите малку пониски, околу 700 евра, колку што работодавците се подготвени да платат и за помошник готвач. На готвачите им се нудат плати од 1200 евра па нагоре. Се разбира, во „полуксузните“ одморалишта цените на работната сила се значително повисоки.
Исто така, тамошните работодавци се повеќе се интересираат за работна сила од далечните пазари, на пр. Кина, Филипини, Мексико итн.
Во Италија фалат дури 250.000 работници
И Италија се соочува со сличен проблем како земјите од регионот. Италијанците се помалку ги интересира каква било работа, па дури и сезонска бидејќи, како што велат, многу работи се претешки и слабо платени.
Според министерот за туризам Масимо Гараваља, само во туристичкиот сектор годинава недостасуваат 250.000 работници, па затоа е се потешко да се најдат келнери, готвачи, рецепционери и друг персонал.
На оваа земја ѝ недостигаат берачи на овошје, физички работници, портири, столари, чистачи, градежни работници, занаетчии итн.
