Антолошката панк-рок химна „God Save The Queen“ од групата Sex Pistols ќе биде повторно објавена во ограничено издание по повод платинестиот јубилеј на кралицата, 45 години откако предизвика скандал во кралството.
Антимонархистичката химна, чии остри стихови ги потпишува фронтменот на бендот Џони Ротен, е објавена во 1977 година, кога кралицата го прославила својот сребрен јубилеј – 25 години на тронот.
Песната, која зборува за кралицата како нечовечко суштество и го нарекува нејзиниот режим фашистички, тогаш била забранета на радиото и телевизијата Би-Би-Си.
Но, тоа само ја направи уште попопуларна и таа заврши на второто место на официјалните музички листи на синглови.
Неколку илјади плочи ќе бидат пуштени во продажба на 27 мај. Ова ги вклучува и двете оригинални изданија, од издавачките куќи Virgin Records и A&M Records.
Sex Pistols најпрво потпишале договор со A&M, но поради нивното ужасно однесување, издавачот брзо ги избркал, по што младиот претприемач Ричард Бренсон ги привлекол кон својата Virgin.
„Еден од најбараните винили во историјата се враќа на полиците. Двете изданија се во ограничено издание“, пишува на официјалниот Твитер профил на бендот. Членовите на бендот ја свиреа песната на денот на сребрениот јубилеј додека пловеа на брод на реката Темза и подоцна беа уапсени еден по еден додека излегуваа на брегот. Во меѓувреме ставовите на Џони Ротен, со вистинско име Џон Лидон, омекнаа.
„Како човечко суштество, би ми недостасувала во светот“, рече Лидон во интервјуто пред пет години. „Не е таа виновна што е родена во златен кафез. Нека живее долго. Не би зборувал за нејзиното владеење, но нека живее долго.“, изјави 66-годишниот панк ветеран.
