Во пресрет на новото издание на „Макфест“, кое на 30 и 31 октомври ќе се одржи во Штип, се потсетуваме на песните што оставија белег на фестивалската сцена. Една од нив е „Нема утеха“ на Александра Пилева, со која пејачката во 2004 година ја освои највисоката фестивалска награда и ги освои симпатиите на публиката.
Повеќе од две децении подоцна, песната сè уште има посебно место во нејзината кариера, а самата Александра се потсети на нејзиниот успех и на емоциите што ги носи секое нејзино изведување.
Песна што ѝ донесе голем успех
Победата на „Макфест“ во 2004 година беше еден од најзначајните моменти во музичката кариера на Александра Пилева. Со „Нема утеха“ таа го освои Гран при, првото место според гласовите на публиката, како и признанието за најдобра интерпретација од акредитираните новинари.
Но, зад успехот на песната се крие и една лична приказна. Во 2024 година, по повод 20-годишнината од победата, Пилева се присети на времето кога се создавал хитот и на моментот кога почнала да верува дека конечно добила песна што ќе ѝ овозможи да го покаже својот потенцијал.
„Конечно песна и за мене“, си помислила Александра додека свиреле во станот на Весна Малинова, потсетувајќи се на почетоците на приказната за „Нема утеха“. Таа го спомена и аранжерот Дарко Тасев, кој имал важна улога во конечниот музички облик на композицијата.
„Секојпат кога ја пеам, доаѓаат такви емоции“
Пилева откри и дека во публиката на фестивалот немала ниту еден близок човек со билет, додека нејзината тогашна продукција не била ни свесна колкав успех ќе постигне песната.
„Немавме ниту еден човек наш со карти во публиката, моите беа дома, а пак продукцијата моја тогашна не беше ни свесна за тоа што песнава ќе донесе…“
„Секојпат кога ја пеам „Нема утеха“ доаѓаат такви емоции што публиката ги познава и ги наградува“, сподели пејачката по повод јубилејот.
Нејзините зборови покажуваат дека песната за неа не е само потсетување на една фестивалска победа, туку и композиција со која и по толку години повторно се поврзува со публиката.
„Макфест“ засекогаш во нејзиното срце
Иако веќе со години живее во Чикаго, САД, Александра Пилева не ги заборава ниту македонската публика ниту фестивалот на кој го постигна еден од најголемите успеси во кариерата.
Нејзината неодамнешна видеопорака до „Макфест“ повторно ги разбуди сеќавањата на победата во 2004 година, но и ги заинтригира љубителите на нејзината музика.
„Макфест засекогаш ќе си ми во срцето. Не сме завршени сè уште, ќе се видиме наскоро пак“, порача Пилева.
Дали оваа најава ќе значи и нејзино повторно појавување пред македонската публика, останува да видиме. Но, во пресрет на новото фестивалско издание, нејзината порака е убав повод да се потсетиме на „Нема утеха“ – песната со која пред 22 години го освои „Макфест“ и остави свој белег во историјата на фестивалот.
Животот во Чикаго со сопругот Зоран и синот Лука
По успешните години на македонската музичка сцена, Александра Пилева во 2013 година се пресели во Чикаго, САД, заедно со сопругот Зоран Чадиев и нивниот син Лука. Зоран ѝ е познат на македонската јавност и како поранешен тренер на женската одбојкарска репрезентација, а пред заминувањето во Америка, сопружниците имале и свој рок-бар во Скопје.
Во Америка, Александра започна ново професионално поглавје и денес работи како агент за недвижности. Сепак, музиката остана дел од нејзиниот живот, па повремено настапува и пред македонската публика во САД.
Нивниот син Лука, роден во 2011 година, тргна по свој спортски пат и сериозно се занимава со тенис. Пилева неодамна сподели и радосна вест за неговиот успех на тениски турнир во Америка, гордо истакнувајќи дека напорната работа се исплатила.
