Некои колачи нè враќаат во детството уште со првиот залак. Такви се и овие мали, миризливи полумесечини со ореви, кои потсетуваат на старите домашни рецепти што се подготвувале за празниците. Нежни, ронливи и со богат вкус на ореви, тие се доказ дека за убав домашен десерт не се потребни многу состојки.
Особено се погодни за деновите на постот, бидејќи се подготвуваат без јајца, млеко и путер. Потребни се само пет основни состојки и малку трпение додека тестото се лади. Колачите се печат десетина минути, а кога ќе се наросат со шеќер во прав, изгледаат како мали снежни полумесечини што некогаш ги краселе празничните трпези.
Состојки
За околу 16 колачи:
– 150 г брашно
– 30 г кокосов шеќер
– 75 г мелени ореви
– 25 г кокосово масло
– 55 мл вода
– Шеќер во прав за украсување, по желба
Подготовка
Во поголем сад ставете ги брашното, кокосовиот шеќер и мелените ореви. Промешајте ги за оревите рамномерно да се распоредат низ смесата.
Растопете го кокосовото масло и додајте го во садот заедно со водата. Замесете тесто додека состојките убаво да се соединат и да добиете компактна смеса што лесно се обликува.
Ставете го тестото во фрижидер и оставете го да отстои најмалку 30 минути. Овој чекор ќе помогне тестото да се стегне и полесно да ги обликувате колачите.
Извадете го тестото од фрижидер и поделете го на 16 приближно еднакви делови. Од секој дел со дланките направете мало валјаче, а потоа нежно свиткајте ги краевите за да добиете форма на полумесечина.
Наредете ги колачите во плех обложен со хартија за печење, оставајќи малку простор меѓу нив. Печете ги во претходно загреана рерна на 180 степени околу 10 минути, внимавајќи да не потемнат премногу.
Кога ќе ги извадите од рерната, оставете ги кратко да се изладат, бидејќи додека се топли се покршливи. По желба, наросете ги со шеќер во прав.
Послужете ги со шолја топол чај или кафе. Нивниот едноставен вкус и мирисот на ореви се доволни за да внесат малку празнична атмосфера во домот.
