Актерката Никол Кидман со нејзиниот сопруг Кит Урбан ги воспитува своите деца на традиционален начин. Таа сака нејзините ќерки, 13-годишната Сандеј и тригодини помладата Фејт да градат свој став и самодоверба без влијанието на социјалните мрежи.
Австралиската како специјална гостинка на панел дискусија во која се зборуваше за мајчините грижи ја отвори темата за децата и користењето на социјланите мрежи. Иако мајчинството е огромна радост за неа, 53-годишната ѕвезда вели дека нејзината цел е да ги води и воспитува своите деца, а не да стане „родител на хеликоптер“ кој постојано ќе ги надгледува или ќе им поставува услови.
Кидман вели дека се плаши од влегувањето на Сандеј и Фејт во светот на социјалните мрежи и признава дека и самата не ги владее многу.
„Многу ми е тешко што морам да ги следам и надгледувам, но и понатаму нема да дозволам да бидат на Инстаграм. Во моментов, моето 13-годишно дете сака да се вклучи во сето тоа и тука има малку „повлечи – потегни“ на таа тема , но не попуштам. Мислам и дека многу родители би се согласиле со мене“, вели Кидман, чиј приоритет во воспитувањето е зачувување на самодовербата на децата.
„Јас сè уште ги насочувам, но не им „командувам“. Им дозволувам да прават грешки, „паднат и сами да станат“ и да се обидат да ја апсорбираат таа болка. Има толку многу работи во воспитувањето на децата, но на крајот тоа е една голема радост. Радост е што овие две прекрасни мали жени растат и откриваат нови работи од ден на ден. Го сакам тоа“, вели Кидман.
Иако познатата актерка е блиска со своите биолошки ќерки, медиумите постојано пишуваат за нејзиното оттуѓување од Изабела и Конор, нејзините постари деца која таа ги посвои со поранешниот сопруг Том Круз. Заладувањето на односите наводно се случило по нивниот развод, а се верува дека Изабела (27) и Конор (25) како и Круз се членови на Скиентолошката црква.
