Музичарот ја користеше на свирката во Њујорк, пет месеци пред тој да почине…
Гитарата на која фронтменот Курт Кобејн свиреше на легендарниот акустичен концерт на „Нирвана“ во Њујорк ќе се продава на аукција и се очекува нејзината почетна цена да биде еден милион долари, јавува Гардијан.
Станува збор за гитара од моделот „Мартин Д-18Е“ од 1959 година и последен пат е користена во текот на споменатата свирка, во ноември 1993, само пет месеци пред неговата смрт, а ќе биде меѓу највредните експонати што ќе бидат понудени на аукцијата во Беверли Хилс во јуни.
Аукцијата ќе трае два дена – на 19. и 20 јуни. На наддавањето притоа ќе бидат понудени и други лични предмети на Кобејн.
Покрај гитарата, купувачот ќе ја добие и нејзината футрола која ја декорирал Кобејн, како и флаер од албумот „Feel the Darkness“ од 1990 година, од панк-рок бендот „Poison Idea“.
„Горди сме што можеме да ја понудиме оваа историска гитара на Курт Кобејн од неговиот митски настап со Нирвана на Ем-Ти-Ви анплагд. Како дел од една од најнезаборавните свирки во историјата, оваа гитара има важно место во музичката историја“, изјави Дарен Џулиен, претседателот на аукциската куќа „Џулиен“.
