Актерот Брајан Тарантино, кој домашните гледачи го знаат по улогата во серијата „Сопранови“, но и од серијата „Девојките на Гилмор“, е пронајден мртов, пренесува американскиот портал Ти-ем-зи.
Полициските извори тврдат дека телото на 60-годишниот актер било пронајдено во саботата наутро во неговиот стан на Менхетн. Според првите информации, причина за смртта на актерот е предозирање.
Како што пишуваат странските медиуми, на актерот околу 17 часот му дошла во посета внуката и го нашла неподвижен на каучот. Повикала брза помош, но веќе било прекасно. Наводно покрај неговото тело бил пронајден и бел прав.
Портпаролката на актерот Лори Смит изјави дека нејзиниот клиент во последно време бил болен и дека во домот се опоравувал.
„Го познавам со години, беше неверојатен, многу талентиран актер и многу драга личност. Многу сум шокирана и тажна“, изјави таа.
