Сигурно веќе сте слушнале дека нашата натална карта е поделена на 12.астролошки куќи. Секоја, таканаречена куќа во Зодијакот, одговара на еден сектор од нашиот живот. Астролошките куќи играат фундаментална улога во истакнувањето на карактеристиките на нашата личност.
Првата куќа е онаа на Асцендентот и нè претставува нас – како нè гледаат другите, како се претставуваме пред светот. Каква е нашата појавност, нашиот изглед.
Втората куќа ја претставува нашата сопственост, нашите пари, материјалните добра.
Преку третата куќа ги гледаме нашите односи со браќата/сестрите, нашата комуникација со другите, но и ни дава информации за нашите (кратки) патувања.
Четвртата куќа е таканаречена куќа на домот, ни дава информации за нашите родители, потеклото, и воопшто, информации за нашиот дом.
Петтата куќа е Дом на љубовта, на страстите, на децата, на задоволството во сите негови форми.
Шестата куќа е онаа на секојдневната работа и честопати ни дава вредни индикации за здравјето.
Седмата куќа ни дава информации за партнерството, бракот, за нашите врски и здруженија.
Осмата куќа е Дом на наследствата, и секогаш е поврзана со минатото. Исто така, таа е Дом на езотеризамот и сексот. Ако втората куќа ни зборува за стекнати материјални добра, осмата ни зборува за нашите наследени материјални добра. Оваа куќа, исто така, е поврзана со „смртта“.
Преку деветтата куќа го гледаме нашето високо образование, мистицизмот, религиозноста, (долгите) патувања, релациите со странци и странство, но таа ги претставува и нашите идеали.
Десеттата куќа ги претставува нашите аспирации и самореализација. Таа е куќа на нашата кариера. Луѓето со голема харизма и успешните луѓе често имаат повеќе планети позиционирани во оваа куќа.
Единаесеттата куќа е Дом на пријателствата и на нашиот социјален живот. Исто така, поставеноста на планетите во оваа куќа ја симболизираат нашата љубов кон светот.
Дванаесеттата куќа ја симболизира нашата изолација (од оваа причина е поврзана со затвори или болници). Таа е Дом на нашите тајни, на нашите соништа и на несвесното во нас, но исто така ја претставува нашата грижа кон другите.
Ајде сега да преминеме на значењето на наталното Сонце во 12-те астролошки куќи во нашата натална карта.
Што значи да се има Сонце во 1 куќа: Одлична позиција која дава физички убави личности. Личности кои знаат да бидат во центарот на вниманието и да ги достигнат целите што си ги поставуваат. Со ваква поставеност на Сонцето имаме и личности со нагласен нарцизам и самоцентричност, личности кои настојуваат секогаш да бидат подобри од другите.
Сонце во 2 куќа: Бидејќи оваа куќа е поврзана со парите и со нашите материјални добра, затоа ваквата поставеност на Сонцето обично дава луѓе кои немаат финансиски проблеми. Поточно, личности кои лесно можат да заработат пари.
Сонце во 3 куќа: Ваква поставеност на Сонцето имаат личности кои одлично комуницираат со другите, добри писатели и новинари, но исто така, личности кои имаат одлични односи со блиските роднини, особено со браќата/сестрите. Сепак, дава и личности кои имаат тенденција да доминираат.
Сонце во 4 куќа: Силна приврзаност со семејството и домот. Ваквата поставеност на Сонцето дава личности кои се одлични во секторот на недвижнини.
Сонце во 5 куќа: Уметнички личности или одлични спортисти. Многу креативност и имагинација. Одлични односи со децата и добра предиспозиција за забавен и социјален живот.
Сонце во 6 куќа: Ова е одлична позиција за оние што работат за други и не сакаат да бидат лидери. Ваквата поставеност на Сонцето обично обезбедува грижа за сопстеното тело и воопшто добро здравје.
Сонце во 7 куќа: Обично дава личности кои не знаат да се чувствуваат добро самостојно, туку секогаш си бараат партнер. Личности на кои им е важно заедништвото и партнерството воопшто. Успешен брак, успешна работа во јавност и добри политичари.
Сонце во 8 куќа: Ги фаворизира финансиските или наследни прашања поврзани со семејството. Интерес за окултизам. Понекогаш дава личности кои со мислите се преокупирани со сексуалноста или смртта.
Сонце во 9 куќа: Личности кои многу патуваат, кои одлично комуницираат со странци/странство. Ваквата поставеност на Сонцето обично дава личности со многу високо образование, но дава и личности кои се заинтересирани за религиозните теми.
Сонце во 10 куќа: Во куќата на професијата и социјалниот успех, Сонцето ја нагласува кариерата на личноста. Обично, ваквата поставеност гарантира успешни и познати личности.
Сонце во 11 куќа: Со ваква поставеност на Сонцето се личности кои имаат голема доверба во пријателствата и кои воопшто, имаат многу пријатели.
Сонце во 12 куќа: Тенденција за изолираност но и фантазери. Многу воздржани луѓе кои немаат желба да направат релација со другите, повлечени личности со богат внатрешен свет.
