Малата црна убавица ГВЕН беше заловена пред неколку месеци од страна на заловувачкиот тим на ЈП Лајка. При нејзиниот прием во прифатилиштето на ЈП Лајка и беа направени сите потребни ветеринарни испитување, кои за жал не покажаа добри резултати.
На Гвен ѝ беше дијагностициран ТВТ (преносливо венеричен тумор), за којшто беше потребно да се извршени хируршка интервенција.
По спроведената операција и неколкукратен третман со хемотерапија Гвен беше излечена од ТВТ тумор. Откога се утврди дека Гвен и во добра здравствена состојба, беше објавена на социјалните мрежи на претпријатието, со цел да и се најде дом каков што заслужува.
Гвен имаше прекрасен карактер, беше исклучително мила, нежна и дружељубива, обожаваше да биде во интеракција со луѓе, особено со деца.
Малата и храбра Гвен, имаше среќа да се вдоми од нашата сограѓанка Катерина, која вели дека покрај нејзините физички и карактерни особини, вниманието најмногу и го има привлечено нејзината приказна и здравствена историја, во која и самата се има лично пронајдено.
Впрочем, Катерина споделувајќи го нејзиното животно искуство ни ја раскажа нејзината приказна за борбата со ракот кој и бил откриен во одреден дел од нејзиниот живот.
Нашата вдомувачка Катерина храбро, трпеливо и со силна желба за живот се има изборено со оваа болест,исто како и малата Гвен.
Денес Гвен е дел од нејзиното семејство, секојдневно и се радуваат, уживаат со неа во прошетките во пририда и и даваат многу љубов, нега и внимание.
