Лекарите од Брисел ќе можат да препишуваат посети на музеи како дел од терапијата за пациенти кои се лекуваат од стрес поради вирусот Корона. На пациентите третирани за стрес во болницата „Бругман“, една од најголемите во белгиската престолнина, ќе им биде понудена бесплатна посета на пет јавни музеи во градот, кои опфаќаат различни теми.
Резултатите од пилот-проектот ќе бидат објавени следната година со намера иницијативата дополнително да се прошири доколку е успешна во ублажување на разни видови стрес, пренесува „Гардијан“.
Делфин Уба, комесарка за култура во Брисел, рече дека се инспирирала за идејата од Квебек, Канада, каде што лекарите можат да препишуваат до 50 музејски посети на пациенти годишно.
Во пилот-проектот во Брисел, посетите на музеите ќе бидат советувани на поединци и групи пациенти во болницата Бругман.
„Кризата со Ковид, поради која беше потенциран стресот, ја потврди важноста на таков проект“, рекла таа за белгиски весник.
Според лекарите од Канада, набудувањето на уметничко дело може да има позитивен ефект врз когнитивните способности на пациентот и може да има смирувачки ефекти во лекувањето на депресија, стрес и вознемиреност.
