Интересно е што, и покрај името, пилешкото на тоскански начин не е традиционално јадење од италијанската покраина Тоскана. Ако прашате Италијанец за овој рецепт, веројатно ќе добиете збунет поглед. Станува збор за италијанско-американски класик чија популарност во голема мера ја поттикна американскиот ресторанскаи синџир Olive Garden со своето јадење „Tuscan Garlic Chicken“.
Но, без оглед на нејасното потекло, рецептот стана светски хит со причина. Се смета за совршен спој на две други популарни јадења: пилешко „Флорентин“ – со сос од павлака и спанаќ, и јадењето „Marry Me Chicken“, познато по кремастиот сос со домати. Резултатот е хармонична комбинација на вкусови што е истовремено богата, утешна и полна со медитерански ароми.
Состојки (за 4 лица):
За пилешкото:
600 г пилешки гради без кожа и коски (2-3 парчиња)
1 лажичка мешавина од италијански зачини (оригано, босилек, мајчина душица)
сол и свежо мелен бибер по вкус
2 лажици маслиново масло (или масло од теглата со сушени домати)
За сосот:
1 помала главица кромид, ситно исечкана
3-4 чешниња лук, ситно исечкани
80 г сушени домати во масло, исцедени и исечкани
150 г свеж „бејби“ спанаќ
250 мл павлака за готвење
50 г свежо рендан пармезан
по желба: 50 мл бело вино, прстофат чили снегулки
Подготовка чекор по чекор:
Подгответе го пилешкото: Ако пилешките гради не се со еднаква дебелина, ставете ги меѓу две парчиња проѕирна фолија и лесно исчукајте ги со чеканче за месо до дебелина од околу 1,5 см. Така ќе се испечат рамномерно. Добро зачинете го пилешкото од двете страни со сол, бибер и мешавината од италијански зачини.
Испржете го пилешкото: Во поширока тава (од нерѓосувачки челик или леано железо) загрејте го маслиновото масло на средно силен оган. Внимателно ставете го пилешкото во тавата, внимавајќи да не ја преполните. Пржете 3-4 минути од секоја страна, без поместување, додека не добие убава златно-кафеава коричка. Испрженото пилешко извадете го на чинија и тргнете го настрана.
Пропржете го зеленчукот: Во истата тава, на маснотијата од пржењето, додајте го исечканиот кромид и динстајте го 2-3 минути додека не стане стаклест. Додајте ги исечканиот лук и сушените домати и продолжете со динстање уште околу една минута, додека лукот не замириса.
Направете го сосот: Додајте го свежиот спанаќ во тавата и мешајте додека не омекне, што ќе трае минута-две. Истурете ја павлаката за готвење, додајте го ренданиот пармезан и добро промешајте. Со дрвена лажица изгребете ги сите вкусни запечени парчиња од дното на тавата за да се соединат со сосот.
Соединете сè: Кога сирењето ќе се растопи и сосот ќе почне лесно да крчка, вратете го испрженото пилешко (заедно со соковите што ги пуштило во чинијата) назад во тавата.
Намалете ја температурата и оставете сè заедно да крчка уште 5-6 минути. Така пилешкото целосно ќе се зготви, ќе остане сочно и ќе ги впие сите вкусови од раскошниот сос. Послужете веднаш.
