Постот во православието зазема важно место и без него нема напредок во духовен и морален поглед. Вистинската цел на постот е чистење на душата и телото од телесни и душевни страсти.
Православниот пост значи воздржување од мрсна храна, што значи дека треба да се воздржуваме од употреба на месо, млеко и јајца, но и од воздржување од лоши мисли и дела. Во деновите на постот, исто така, треба да се откажеме од алкохолот.
Покрај духовното влијание врз човекот, постот има и неверојатно позитивно влијание врз здравјето.
Затоа, целта на велигденскиот пост е двојна – се однесува и на духовното и на физичкото.
Воздржувањето од мрсна храна е корисно за човечкиот организам, но не треба да се пренагласува телесниот пост во однос на духовниот пост што значи поставување на духовни цели, зајакнување на волјата и подготовка за исполнување многу потешки задачи.
Ако навистина постиме тоа значи и да ја покажеме љубовта кон ближниот, а подеднакво да изразиме милостина, да им помогнеме на посиромашните.
Постот носи и опасност – гордост и фалење, ако некој пости за да биде виден од другите, или опасност од чист формализам. ЗНачи, постот не е цел, туку средство за постигнување на повисоки цели.
Велигденскиот пост се смета за најстрог и најдолг од сите четири пости. Почнува денес, на 7.март и трае 48 дена, односно до Велигден.
