Разговараме со Илија Брндевски, „магионичарот“ кој од само дваесет квадратни метри создал цветно царство во Ратаево, село во близина на Берово, каде што Илија живее.
Селото е ридско, на надворска височина од околу 860 метри, вгнездено во една од најживописните области, Малешевијата.
Илија студирал технолошко-технички факултет, вели дека отсекогаш ги сакал цвеќињата но откако се појавил коронавирусот, уредувањето на дворот му станало хоби.
Го прашуваме колку време дневно посветува на оваа убавина.
– Во двор не може да нема работа. После работното време, јас сум во дворот сè додека се стемни – вели Илија кој инаку, сам се грижи за дворските убавици. Меѓу нив најзастапени се кактусите, зашто Илија е љубител на овие растенија. А покрај кактуси има и сукуленти кои – вели – не бараат посебна нега.
Кој е најголемиот предзивик на Илија кога е во прашање дворот?
– Најголем предизвик ми е постојано да ги менувам работите и декорациите, сето тоа да изгледа совршено за мене – ни открива.
А, што би ги советувал овој „магионичар“ за градини оние кои сакаат да почнат да се занимаат со градинарство и одгледување на цвеќиња?
– За почеток може да се почне со секојдневни цвеќиња кои се полесни за одгледуваше, што ги има често кај нас – советува Илија.
