Разузнавачот број еден Вилијам Барнс се сретнал со украинскиот претседател во средината на јануари и во таа прилика ги открил потезите на Русија, пишува Вол Стрит Џурнал.
Во месеците пред руската инвазија на Украина, шефот на ЦИА, Вилијам Барнс, презел две строго тајни мисии: во првата, го предупредил Владимир Путин дека, ако ја нападне Украина, Западот ќе одговори остро со санкции; во втората, тој му ги открил плановите на Кремљ на Володимир Зеленски, обезбедувајќи му суштински информации.
Ова го поткрепува Wall Street Journal, во извештајот кој ги реконструира фазите на кризата и го насочува центарот на вниманието кон ликот на Вилијам Барнс. Роден во 1956 година во воена база во Форт Брег во Северна Каролина, во јануари 2021 година беше назначен за директор на ЦИА од Џо Бајден. Барнс претходно бил американски амбасадор во Москва и потсекретар и заменик државен секретар во администрацијата на Обама, за време на која бил меѓу преговарачите за нуклеарниот договор, заедно со актуелниот советник за национална безбедност, Џејк Саливан.
Според Вол Стрит Џурнал, неговата улога била клучна во украинската криза во најмалку две епизоди: првата на почетокот на минатиот ноември, кога тој му се јавил на Владимир Путин (благодарение на шифрирана линија), за да го замоли да не продолжува со неговиот план за инвазија на Украина, а Путин му одговорил дека нема намера да стигне до Киев, но исто така нагласил дека Украина не е вистинска земја, туку само политичка одлука на Ленин.
Втората епизода се случила во јануари, кога тој му го открил на Зеленски планот на Москва да го заземе аеродромот Хостомел северно од главниот град за да го опколи, додека со падобранци би можел да се заземе Киев и да се „отсече“ од владата.
Понатаму, изгледа дека Русија се надевала на помош од дел на украинската армија, што не се случи.
Од реконструкциите, исто така, произлегло дека, во првите денови од конфликтот, Соединетите држави му понудиле излез за бегство на претседателот Зеленски, кој, сепак, избрал да остане во земјата. На 26 февруари, објави Асошиејтед прес, Зеленски порача на Вашингтон: „Битката е тука. Ми треба муниција, а не пролаз (за бегство)“, пренесува раињуз.
