Дали би го доеле вашето бебе со туѓо мајчино млеко?
Во Македонија почнува да се шири иницијатива за донирање мајчино млеко „Human Milk 4 Human Babies“ која треба да им овозможи на мајките што од различни причини немаат доволно млеко да ги хранат своите бебиња, а не сакаат да го прават тоа со адаптирано млеко, да го сторат тоа со млеко од друга мајка, која ќе им го донира.
Иницијативата ја покренаа Наташа Цветановска-Тодосовска, сертифициран специјалист за доење (@доењесољубов) Јасна Апостолски-Николов, дипл.мед.сестра и единствениот меѓународно сертифициран лактациски консултант во нашата држава – ИБЦЛЦ, која го води центарот за мајки „Здраво бебе“ @здравобебемк, и Весна Ѓурковска-Каеска, позната во медиумите како долгогодишен активист на тема доење и здрава исхрана кај децата, која стои зад профилот @вкусниприказни.
– Ова е глобална иницијатива и е поттикната од оние мајки или родители кои што посвојуваат деца, а немаат мајчино млеко, да имаат прилика да си обезбедат мајчино млеко. За разлика од банките за мајчино млеко, оваа иницијатива е пошироко отворена. Санува збор на комуникација помеѓу семејствата, стекнување доверба и договор меѓу нив за да може да го споделат мајчиното млеко – вели Јасна Апостолски-Николов.
Социјалните мрежи се основата за реализација на оваа иницијатива – најважната алатка за комуникација. Оваа иницијатива остварува локално спојување на семејствата кои нудат млеко за донација и семејствата на кои тоа млеко им е потребно токму преку социјалните мрежи.
– Во нашата држава постои посебен протокол кој треба да се помине за да ова функционира, неможеме ние како иницијатори доброволно и самоволно да ја покренеме оваа иницијатива без да добиеме одобрение од глобалната мрежа. Ние сме само место каде што секој може да ги добие потребните информации за мајчиното млеко и негово донирање – објаснува Јасна.
Се поставува и прашањето за сигурност на мајчиното млеко. Како мајките да ја остварат довербата помеѓу нив?
– Темелот на оваа иницијатива е заемната доверба меѓу семејствата кои се спојуваат. Донацијата понатаму се извршува директно меѓу семејствата. Правилата се мајката да биде искрена при објавата и да ги наведе сите информации што се релевантни за семејството кое би го користело тоа млеко за дохранување, на пр., дали мајката пуши, дали пие алкохол, дали зема медикаменти и сл. – вели Јасна.
Иницијативата нуди простор за нивно поврзување и заштита на нивното право да го направат она што е нормално, здраво и еколошко. „Human Milk 4 Human Babies“ е распространета низ светот и одлично функционира. Веќе се регистрирани над 100 земји каде што донирањето мајчино млеко е целосно организирано.
