Ава Карабатиќ на Инстаграм објави дека ќе се кандидира на претседателските избори во Хрватска
„Сакам да ја информирам јавноста дека официјално ја објавувам мојата кандидатура за претстојните претседателски избори. Како професор по италијански и латински јазик, со диплома стекната на државен универзитет, ја нагласувам важноста на образованието, културата и професионалниот пристап во сите аспекти на општествената дејност.
Со оглед на тоа, барам во јавноста да ми се обраќаат моите вистински професионални и академски квалификации, а не сензационалистички етикети како ‘старлета’, кои го омаловажуваат мојот труд и работа“, напиша Карабатиќ на Инстаграм.
„Денеска имав исклучително конструктивен и инспиративен разговор со министерката за култура, г-ѓа Нина Обљен Коржинек. Таа средба, обележана со меѓусебно разбирање, дополнително ме поттикна да ја донесам оваа важна одлука и да ја објавам мојата кандидатура.
Културата, образованието и општествената одговорност се основата на мојата програма, со цел градење на општество во кое се вреднуваат трудот, стручноста и иновативноста.
Ви благодарам за поддршката и со нетрпение очекувам да ја споделам мојата визија за подобро општество со вас“, објави таа.
