Денес, 26 јануари, пред неговиот погреб во Загреб, Скопје ќе го испрати својот сограѓанин и пријател, легендарниот фронтмен на групата „Парни ваљак“ и најдобриот рок-вокалист во поширокиот регион – Аки Рахимовски.
Поради епидемиолошките ограничувања, последното испраќање на Аки се организира на Градскиот плоштад, кај тревникот пред „Пелистер“, каде ќе биде отворена книга на жалост и ќе се слушаат неговите песни. Сите пријатели, обожавателите на неговата музика и почитувачите на неговата работа ќе можат од 13 часот да се запишат во книгата на жалост, да положат цвеќе или да запалат свеќа во чест на нашиот Аки, наведуваат организаторите.
Главното собирање се планира од 18 до 19,30 кога хорови, пејачи и пријатели заеднички, за збогување, ќе отпејат некои од најголемите хитови на „Парни ваљак“.
„….Тужна ја наша улица од када ниси ту
Јер тужну песму пјевају они што остају…“
Последното збогување со Аки Рахимовски го организира Радио бубамара со поддршка КЛС Саунд и Град Скопје.
На Градскиот плоштад ќе ја слушнеме и песната „Ако згрешам, нека изгорам“ на Пепи Бафтировски, која Аки во клавирска придружба ја сними пред пет години во студиото на „Тавитјан брадерс“. Тоа е неговата последна снимка кај нас. Неделава, оваа песна се емитува како хит на Бубамара радио, наведуваат организаторите.
(ВИДЕО) КАРОЛИНА ЕМОТИВНО ЗА АКИ РАХИМОВСКИ: Тргни и полетај, без страв!
Аки Рахимовски е роден во Ниш, но пораснал во Скопје и тука почнал да го стекнува музичкото образование. Тој во 1975 година со Хусеин Хасанефендиќ Хус ја основа првата постава на „Парни ваљак“, а почина на 22 јануари на 67-годишна возраст.
