Искористете ја вашата фантазија и од јајцата кои се скршени направете интересни пиленца, зајчиња, бубамари…Во подготовката на овие преслатки мезиња вклучете ги и вашите деца, ќе се радуваат.
Слатки пиленца
За слатки велигденски пилиња потребно ви е: варени јајца, мајонез, морков, неколку маслинки и листови од зелена салата за декорација.
Сварените јајца, чија луспа напукнала при варењето, или пак, веќе сте ги искористиле за ритуалот со кршење јајца, излупете ги. Потоа, пресечети го горниот дел (врвот) за да изгледа како капа, внимателно без да допрете до жолчката на јајцето. Отстранете ги белите „капчиња“ од јајцата, и со помош на шприц за готвење ставете малку мајонез врз останатиот дел од јајцето. Мајонезот ќе ја претставува главата на пиленцата. Исечкајте ги маслинките, отстранете ја од нив семката, и направете им очиња на пиленцата. Морковот сварете го и потоа иситнете го на парченца во форма на тријаголник – тоа ќе бидат клунчињата на пиленцата, и само забодете ги во мајонезот. Вратете им ги на пиленцата „белите капчиња“ и тие ќе заличат како тукушто да се испилиле. Наредете ги пиленцата во сад украсен со листови од зелена салата или рукола.
Букет цвеќе
Постапката е многу едноставна, а потребни ви се само варени јајца и млад кромид.
Исечето го врвот на јајцето во цик-цак форма, оставајќи да се надѕира жолчката како да е пупка на цветот. Потоа, на долниот дел од јајцето додадете ги зелените листови на кромидот. Ќе добиете прекрасни лалиња.
Весели зајчиња
Од неколку јајца, претходно сварени, може да направите и зајчиња. Со помош на чепкалки (скршени на мали парчиња), црни маслинки и моркови, декорирајте ги белите јајца – направете им очи, уши и мустачиња.
Бубамари
Весели бубамари лесно ќе направите на тој начин што јајцето ќе го пресечете на половина, а врз него – врз жолчката ќе ставите ливче од босилек, рукола или нане. Врз ливчето – на половина пресечено чери доматче кое ќе го украсите со дамки со помош на ситно сечкани маслинки.
