Почина Норм Мекдоналд, омилениот комичар во улога на водител на „Weekend Update“, популарниот додаток на шоуто „Saturday Night Live“.
Мекдоналд почина на 61-годишна возраст. Комичарот се борел со рак со години, но својата дијагноза се обидувал да ја држи во тајност, изјави неговата пријателка и соработничка Лори Џо Хоекстра за „Си-Ен-Ен“.
„Беше горд на својот хумор. Никогаш не сакаше да дозволи дијагнозата да влијае на тоа како ќе го гледа неговата публика или неговите најблиски. Норм беше чиста комедија. Еднаш напиша дека шегата треба да ги изненади луѓето, а не да им се додворува. Тој секако дека никогаш не се додворуваше. Ужасно ќе ми недостасува“, рече таа.
Норм Мекдоналд е роден во 1959 година во Квебек, Канада. Својата кариера ја започна како стенд-ап комичар и настапувал во низа клубови низ Канада.
Во 1987 година добил можност да настапи на фестивал за комедија во Лос Анџелес и потоа одлучил да се пробие до Холивуд. Работел на сценариото за серијата „Roseanne“ во 1992 година.
Наскоро се приклучи на тимот на „Saturday Night Live“, каде се истакнуваше со своите одлични имитации на познати личности, и беше домаќин на „Weekend Update“ од 1994 до 1998 година.
