Интервјуто што Бела Хадид го даде за „Vogue“ го шокираше светот, а по неговото објавување беше нападната нејзината мајка бидејќи многумина сметаат дека таа е главен виновник за она низ што поминала манекенката.
Поранешната манекенка, 58-годишната Јоланда Хадид, денес позната како мајка на супермоделите Бела и Џиџи Хадид, се најде под лупа на јавноста откако нејзината помлада ќерка Бела во интервју за „Vogue“ откри дека го оперирала носот на 14 години. Бела кажа дека се кае за тоа што го направила, а корисниците на социјалните мрежи веруваат дека на тоа ја принудила нејзината мајка.
„Никому на 14 години не му паѓа на памет да прави пластична операција освен ако некој не му го повторува тоа многупати за да стане несигурен“, напиша еден корисник на Твитер, а други додадоа: „Во што се обложувате дека Јоланда е виновникот што Бела се чувствувала лошо поради нејзиниот нос?“, „На 14 години си премногу млад за да го оперираш носот… Јоланда никогаш не требало да има деца!“, „Бела Хадид го оперирала носот на 14 години??? Има посебно место во пеколот за Јоланда!“
Инаку, Јоланда Хадид, која исто така своевремено беше супермодел, е позната како личност што е брутално искрена кон своите ќерки кога е во прашање успехот во модната индустрија. Ова не е првпат таа да се најде под лупа на јавноста поради нејзиното воспитување.
Нешто слично се случи и во 2019 година, кога еден магазин објави фотографии од Бела и Џиџи за време на нивното појавување во реалното шоу „The Real Housewives“, во кое учествуваше Јоланда. Тогаш Јоланда беше исмејувана затоа што ги советуваше ќерките да држат диета, а на Џиџи и забрани да игра одбојка со изговор дека спортот ќе ја направи „огромна“.
