Британскиот крал Чарлс Трети вчера (вторник) го откри својот прв официјален портрет од неговото крунисување кое се случи минатиот мај. Масло на платно од уметникот Џонатан Јео го прикажува Чарлс III на позадина со живописни црвени нијанси, во униформа на воената единица на велшката гарда, со пеперутка над рамото.
„Налик на пеперутката што ја насликав како лебди над неговото рамо, овој портрет еволуираше како што се промени улогата на субјектот во нашиот јавен живот“, рече Јео, кој претходно го насликал починатиот татко на кралот, принцот Филип.
View this post on Instagram
Портретот откриен во Бакингемската палата беше нарачан во 2020 година за да прослави 50 години во 2022 година на тогашниот принц од Велс како член на организацијата за доделување грантови, The Drapers’ Company, соопшти палатата.
„Мојата цел беше и да се осврнам на традицијата на кралското портретирање, но на начин кој ја отсликува монархијата на 21 век и, пред сè, да ја пренесам длабоката хуманост на темата“, додаде авторот на сликата.
Маслото на платно се очекува да биде изложено во Дрејперс Хол во финансискиот кварт во Лондон од крајот на август, соопшти палатата.
Сепак, мислењата за портретот на кралот се поделени, некои мислат дека е модерен и многу успешен портрет, додека други го нарекуваат „морничав“.
