Судири и инциденти помеѓу противниците и полицијата ја одбележаа Парадата на гордоста која сепак се одржа вечерва во Белград. Има десетина повредени полицајци, но српската премиерка Ана Брнабиќ на вонредна прес-конференција изјави дека целиот ден поминал во мир, и дека е особено горда на тоа.
На белградските улици биле ангажирани околу 5.200 припадници на Министерството за внатрешни работи.
„Имавме само два инцидента. Тоа беше конфликт со одредени групи во Славија, и конфликт со одредени групи во паркот Караѓорѓе. Припадниците на Министерството за внатрешни работи реагираа и го решија проблемот, обезбедувајќи инцидентите да не се шират понатаму.Сакам да ја изразам мојата лична благодарност, благодарноста на Владата на Република Србија до сите граѓани на Србија или големото мнозинство затоа што покажаа толеранција, разбирање и грижа кон Србија“, рече Брнабиќ.
Премиерката смета дека она што го разубавува имиџот на Белград и Србија е тоа што досега се случија многу настани во рамките на Европрајд, а не се случи ниту еден поголем инцидент.
– Тоа доволно зборува за нашите граѓани. За мене тоа е вистинската слика за Белград и Србија. Покажавме дека сме сериозна земја која ги почитува своите институции, но и правата на сите граѓани. За жал, имаме 10 полицајци кои се полесно повредени“, рече Брнабиќ и додаде дека се оштетени пет интервентни полициски возила и дека се приведени вкупно 64 лица.
