Овогодинешното 94-то доделување на Оскарите ќе го водат три актерки – Реџина Хол, Ејми Шумер и Ванда Сајкс, пишуваат „Варајети“ и „Холивуд репортер“.
Поминаа 35 години откако дури три лица го водеа најголемиот холивудски спектакл, но никогаш досега толку жени не биле на сцената во една вечер во улога на водители на престижната церемонија на доделување награди.
„Холивуд репортер“ минатата недела објави дека церемонијата на Оскар, во продукција на Вил Пакер, а во режија на Глен Вајс, ќе ја водат три лица со цел да ја зголемат гледаноста и да бидат интересни за разновидна публика.
Имено, Оскарите се обидуваат да привлечат нови гледачи по рекордно ниската гледаност во 2021 година.
Официјалното соопштение ќе биде објавено во вторник во емисијата „Добро утро, Америка“ на Еј-би-си – канал кој на 27 март ќе ја емитува церемонијата на доделување на „Оскарите“.
