Кралот на шумите, европскиот елен го најде својот дом во Националниот Парк Галичица. По неколку децении пауза, кога речиси беше доведен до истребување, повторно се создадоа услови, европски елени да ја збогатат фауната на Галичица. Основна причина за предлогот е отпочнатиот процес на сукцесија во високо планинските пасишта.
– Високо планински пасишта (тревни екосистеми) на Националниот парк Галичица кои имаат значителна вредност со големо богатство на биолошка разновидност, се создадени со интеракција на локалното население и природата со векови со традиционални практики за пасење овци и говеда. Во одреден временски период таквиот начин на интеракција се изгубил заради напуштањето на традииционалната испаша на стока на овие предели. Сега со враќањето на елените се обидуваме да го вратиме активното управување со овие живеалишта – објаснува Андон Бојаџи раководител на одделението за заштита на природата во Јавната установа национален парк „Галичица“.
Новиот дом е опремен со модерна инфраструктура: карантин, хранилишта, поилишта, солишта и набљудувачници, а елените ќе се користат исклучиво за активно управување и одржување на уникатните екосистеми на Галичица.
– Репродуктивниот центар за Европски елен (Cervus elaphus) се наоѓа на локалитететот „Косто бачило“, изграден е на површина од 85 хектари ограден е со специјална жичена ограда, инфраструктурни објекти. Донесовме 30 единки, од кои 24 женки и 6 мажјаци. Елените ги добивме преку УНДП од ловиштето на Ниџе Планина. Сите беа здрави, добро оформени, со добра крвна линија, погодни за репродуктивен центар.
Заштитата и зачувувањето на високо-планинските пасишта се од голема важност поради тоа што тие се карактеризираат со висока биоразновидност на ендемични растителни и животински видови, а исчезнувањето на овие видови ќе значи и промена на самото живеалиште, условите во него, како и самиот пејаж во Националниот Парк Галичица.
– Репродуктивниот центар е изграден исклучиво за одгледување и враќање на елените во Паркот, а строго забрането е лов и други недозволени активности. Враќањето на Европскиот eлен на падините на Галичица, ќе овозможи природен циклус на испаша, зачувување на природните карактеристики на високо-планинаиските пасишта, но ќе допринесе и за поголема заштита од пожари бидејќи пасиштата нема да бидат обраснати со високи треви кои претставуваат висок ризик за ширење на пожарите во случај на ветер и големи температури – вели Андон Бојаџи.
Според карактеристиките мажјаците имаат силно развиени рогови. Женките се собираат во крда кои ги предводи доминантна женка. Живеат во листопадни шуми и планински предели, а како тревопасни животни најчесто пасат на шумските ливади и ги брстат лисјата од дрвјата и грмушките. Нивната реинтродукција во Паркот придонесува за одржување на високопланинските пасишта и спречување на сукцесивните процеси, но и за восхитување на нивната убавина покрај постоечката на Галичица.
