– Денес времето во Македонија ќе биде претежно облачно со повремен локален дожд и тоа особено во јужните предели. На планините ќе провејува снег. Ќе дува слаб до умерен ветер од источен и од југоисточен правец. Во Скопје и околината времето ќе биде претежно облачно со услови за слаб локален дожд. Ќе дува слаб до умерен ветер од југоисточен правец. Максималната температура ќе се искачи до околу 7 степени – вели метео прогнозерот Славчо Попоски.
Потоа во следните денови времето ќе се задржи претежно облачно со повремени локални врнежи од дожд. На планините врнежите ќе бидат од снег, а повеќе врнежи и во поголем дел од државава ќе има во понеделник. Во првите денови од следната недела ќе дува и умерен до засилен ветер од северен правец, а особено во понеделник услови за врнежи од снег кој би бил релативно мокар ќе има и на некои места со надморска височина од околу или под 1000 метри, и тоа особено во западните и во северните предели.
Температурите ќе се искачуваат во интервалот од 5 до 12 степени, додека пониски температури ќе имаме во понеделник и истите ќе се искачуваат во интервалот од 3 до 10 степени. Уште поголемо заладување на времето, и тоа поради понатамошен продор на студен воздух од север се очекува од средината на наредната недела, односно од среда.
