Почетокот на 2022 година беше многу драматичен на северот на Кина, каде што дошло до инцидент, а само со помош на среќа биле избегнати сериозни последици.
Возачот на камионот ги следел упатствата на GPS навигацискиот уред и на тој начин дошол на тесен дел од патот. Камионот бил премногу широк за да помине, но возачот сепак продолжил. Сфатил дека нема да може да помине, па се обидел да се врати возејќи наназад и во еден момент за малку ќе паднал во провалија длабока речиси стотина метри.
Сцените од местото на несреќата изгледаат нереално, кабината и предниот дел на приколката висат од карпата, па вистинско чудо е како возачот успеал да излезе од кабината и да побегне на безбедно. Мотоциклист кој возел позади камионот, бил сведок на инцидентот.
– Овој пат има ограничувања и не може да помине возило кое е повисоко од два метри. Цел ден паѓаше снег, камионот продолжи да вози и излета од патот. Се обиде да се извлече, но за малку ќе паднеше од планината и сега сообраќајот е целосно блокиран – рекол очевидецот.
Акцијата на извлекување на камионот траела три дена, а во неа биле вклучени дури три шлепери. Со оглед на сложеноста на ситуацијата, немало друга алтернатива освен да се преполови возилото, за да може на парчиња да се извлече од опасниот пат.
