Во ексклузивно интервју во неговата резиденција во Ватикан за Ројтерс, папата Франциск негираше дека планира да поднесе оставка и исто така ги негираше гласините дека има рак, шегувајќи се дека неговите лекари „не ми кажале ништо за тоа“.
Во медиумите кружеа гласини дека папата сака да се повлече, но Франциск го негираше таквото сценарио. Но тој , сепак, го повтори својот став дека еден ден би можел да поднесе оставка доколку неговата здравствена состојба толку се влоши што ќе му оневозможи да раководи со црквата. Запрашан кога мисли дека тоа би можело да биде, тој рече: „Не знаеме. Бог ќе каже“.
Папата ги планира и следните патувања. „Би сакал да одам во Украина, а најпрвин сакав да одам во Москва“, рече тој.
Потоа папата го осуди абортусот. За одлуката на Врховниот суд на САД изјави дека ја почитува, но дека нема доволно информации за да зборува за тоа од правен аспект. Сепак, остро го осуди абортусот, споредувајќи го со „најмување платен убиец“.
„Прашувам: дали е легитимно, дали е правилно да се елиминира човечки живот за да се реши проблем?“, рече папата.
