Започнавме убава соработка со една врвна готвачка која секое јадење го претвара во магија од вкусови – Теодора Георгиевска.
Оваа извонредна мајсторка и една од највлијателните готвачки на социјалните мрежи кај нас, стои зад бројните рецепти кои ги објавува на профилот „Готвиме со Теа“ – „gotvime.so.tea“.
Денес Теа ни откри еден рeцепт кој за момент ја врати во нејзините детски безгрижни денови, но и рецепт кој многу од нас одамна го немаат вкусено:
„Оваа торта ме потсетува на моето детство и на сите важни настани од тоа време. Долго време ја немав пробано и затоа се решив да ја подготвам и замислете вкусот сè уште е истиот.
Засукајте ги ракавите и подгответе ја тортава за викендов“.
Потребни состојки:
За црно тесто: х3 (тавче 30)
▪️3 јајца
▪️3 лажици шеќер
▪️1 лажица брашно
▪️30 гр. темно чоколадо за готвење
▪️70 гр. мелени ореви
За бело тесто:
6 белки
▪️150 гр. шеќер
▪️4 лажици брашно
▪️150 гр. сецкани ореви
▪️150 гр. суво грозје (отстојано во рум 2-3 часа)
За фил:
▪️6 жолчки
▪️16 лажици шеќер
▪️6 лажици брашно
▪️1 л. млеко + по потреба
▪️250 гр. путер или маргарин
▪️2 кесички ванилин шеќер
▪️4 лажици шеќер во прав
Начин на подготовка:
Во длабок сад изматете 3 јајца со 3 лажици шеќер. Откако ќе ги изматите додадете го брашното, чоколадото и оревите. Убаво измешајте и смесата распоредете ја во тавче обложено со хартија за печење и печете во загреана рерна на 200 °С, 15-20 минути. Оваа постапка се повторува 3 пати, односно се прават 3 црни теста.
Во длабок сад изматете ги белките со шеќерот. Откако ќе добиете пенаста смеса додадете ги брашното, сецканите ореви и сувото грозје. Измешајте и распоредете ја смесата во тавче обложено со хартија за печење и печете во загреана рерна на 200 °С. (оваа кора откако ќе се испече се дели на два дела).
6 жолчки изматете ги со 6 лажици шеќер. Потоа додадете 6 полни лажици брашно и измешајте. Доколку е многу густо додадете неколку лажици млеко.
Во тенџере на оган ставете го млекото да се загрева заедно со 10 лажици шеќер. Откако ќе почне да врие се трга на страна и во него со постојано мешање додадете ги претходно подготвените јајца. Убаво измешајте и вратете го тенџерето на тивок и продолжете со варење, додека да се згусне. Вака подготвениот фил се остава да се излади.
На крај изматете го путерот со ванилиниот шеќер и шеќерот во прав и измешајте го со претходно изладениот фил.
Филувајте ја тортата и оставете ја убаво да се излади неколку часа.
На здравје и уживајте!
