„Битката за регионот Донбас ќе влезе во историјата како една од најбруталните борби во Европа и за Европа“. Украинскиот претседател Володимир Зеленски го изјави ова по признанието дека киевските трупи биле потиснати од центарот на Северодонецк, кој заедно со Лисичанск во моментов останува единственото упориште на Украина во регионот Луганск, во Донбас.
Според агенцијата Аднкронос, владините претставници рекле дека трите клучни мостови што го поврзуваат Северодонецк со Лисичанск сега се непроодни за возила, што значи дека влезните правци за снабдување и излезните за евакуации низ тие рути се невозможни.
Зеленски рече дека Украинците се соочуваат со „значајна предност на Русите во количината на опрема и, особено, во артилериските системи. Цената на оваа битка е многу висока за нас. Страшно е. И секојдневно го привлекуваме вниманието на нашите партнери на фактот дека само доволно модерна артилерија за Украина ќе ја гарантира нашата предност и, на крајот, ќе стави крај на руската тортура врз украинскиот Донбас“.
