Москва бара од Белград да ги открие сите факти.
Москва побара од Белград официјален став за информацијата дека од Србија и е доставено оружје на Украина, изјави портпаролката на Министерството за надворешни работи на Руската Федерација, Марија Захарова.
„Веќе побаравме од Белград да даде изјава. Ваквите изјави не треба да се даваат преку медиумите, ниту преку Телеграм, ниту преку протекување информации, туку преку официјалната комуникација на ставот на српската страна“, изјави Марија Захарова, пренесува ТАСС.
Таа додаде дека мора да се откријат фактите и врз нив да се извлечат соодветни заклучоци, бидејќи тоа е „исклучително важна тема за билатералните односи“.
Захарова претходно денеска изјави дека Москва е длабоко загрижена поради наводите за вмешаност на Србија во продажбата на оружје на Украина.
„Внимателно ја следиме оваа приказна. Обрнавме внимание на неодамнешната дискусија на оваа тема во српскиот парламент. Информациите што кружат, се разбира, предизвикуваат наша најдлабока загриженост“, изјави Захарова во коментарот објавен на веб-страницата на Министерството.
