Русија сака и Украина и Западот да седнат на преговарачка маса за да склучат нов голем договор. Ова го тврди Ибрахим Калин, портпарол на турскиот претседател Ердоган, според она што е објавено во медиумите во Анкара и реобјавено од „Украинска правда“.
„Знаеме: Русија сака да седне на преговарачка маса не само со Украина, туку и со Западот и да потпише нов голем договор. За преговорите, сите страни, вклучително и Европа и САД, мора да заземат решителна конструктивна позиција“, додаде Калин, објаснувајќи дека за средба меѓу Путин и Зеленски е неопходно да се постигне одреден напредок во преговорите.
Ќе биде потребно време, додаде тој, подвлекувајќи дека „настаните од последните неколку недели за жал негативно се одразија на овој процес.
„Но, ние ќе продолжиме да одиме напред преку преговори и дијалог, а не со војни, покажувајќи трпение и истрајност “, објаснува Ибрахим Калин, портпарол на Ердоган.
