– Како што најавивме, во следниот период ќе имаме претежно облачно и СТУДЕНО време со повремени врнежи од дожд и снег на пониските, и само снег на повисоките места и на планините. Локално и повремено врнежите ќе бидат ПОИНТЕНЗИВНИ и ќе преминуваат само во снег и на некои пониски места. Во следните денови на повисоките и планинските места снежната покривка значително ќе се зголеми, а нова ќе се формира и на некои пониски места, особено во западните и во југозападните предели. Што се однесува до температурите, минималните ќе се спуштаат во интервалот од -4 до 3 степени, додека максималните ќе бележат тенденција на значителен пад и во следните неколку денови ќе се искачуваат во интервалот само од 0 до 7 степени, и истите ќе бидат под просекот за овој период од годината, односно ќе биде ПОСТУДЕНО од вообичаеното – вели метео прогнозерот Славчо Попоски.
И во Скопскиот регион во следниот период ќе има повремени врнежи од дожд со променлив интензитет, додека на околните планини ќе има врнежи од снег. Повремено услови за врнежи од дожд и од снег ќе има и во делови од котлината. Минималната температура ќе се спушта во интервалот од -1 до 1 степен, додека максималната ќе се искачува во интервалот од 4 до 7 степени.
